iPad，我，確實係買咗。

講你都唔信，個心一直想買，但未必係第一批買，因為唔想去排隊，但iPad7月23日響香港開賣前幾日，推友C突然MSN過黎話：喂星期五我請假去買iPad喎！燒吓燒吓，個心果團火燒起咗。適逢近日做野做到痴咗線，連Blog都無乜時間update，真係好想買玩具囉，於是就響星期五朝早，去咗排隊買iPad。

點解我想買iPad？之前嘅Blog Post經已講咗，不贅。淨低嘅，只係WIFI or 3G，16GB定64GB（因為推友J話如果要放售，32GB價位一定唔好，16GB技術型推友S又話一定唔夠用），to be or not to be？哩個真係唔係easy choice。想咗多好日，唔想住，一於跟咗C去買先至算。

其實哩個blog post主要係用黎讚C佢真係好野，一早想到去Elements嘅百老匯買，選哩個地點嘅原因係：1. 室內商場，排隊有冷氣唔辛苦；2. 啲人去哂旺區如旺角銅鑼灣，去IFC咩，你又同班辦公室人爭餐死，最慘d大粒叫o的靚去幫佢買，條隊會好長（而事後證實係對嘅，因為推友B早上去到IFC打算買完返工，但條隊200人長！），而九龍站就因為坐車咁鬼死麻煩，無人想去。我哋去到九點幾經已開始有人排，但無見到Studio A同DG咁誇張嘅人龍囉，咁一路傾住計，一路排，以為佢好似website咁講11點先至開，但係10點鐘竟然就開咗（可能跟凶宅掛），同埋人流控制做得好好，所以我哋10點3個字經已好peaceful咁買完走番出黎。至於買乜野版本哩個問題，竟然係俾C嘅中學同學一句就KO咗，因為佢話：「你買16GB啊？但只係爭咗1,600蚊吓喎」，咁我又覺得佢講得o岩喎，無謂為咗哩度少少一陣間唔夠位用事後後悔，而且第陣時要放機出去都容易啲，所以連C都跟我一樣買咗64GB Wifi+GB版。雖然有人話先要響shop度sync itunes activate以免俾人走水貨，又話要迫你買其他唔等駛野，但係我哋果間又無喎，只係會幫你開封咗個盒嘅膠紙咋嘛。

跟住我哋去咗旺角想貼保護貼，去到都未夠11點，見到凶宅百記有好多人露天熱死辣辣咁排隊，但係我哋經已完成購買程序，真係山中方一日，世上幾千年。可憐M推友響九龍灣排咗300幾人，但係排到去下午竟然係做梗頸二買唔到，而N推友，就響荃灣熱屎辣辣排咗4粒鐘先至買到，F同M推友更上演尋找iPad的故事。不過因為太早星際未開，所以我哋去咗朗豪坊Starbucks飲野，再食個親lunch，先至再去星際貼保護貼。上去到當然就係去之前推友A介紹我嘅二樓舖老闆娘度貼野啦，可能因為佢見到兩個靚女（其實只係C靚，著哂高跟鞋裙仔化靚妝，佢真係好專重買iPad哩件事傢）佢平咗好多俾我哋哇，好開心！之後又去周圍搵iPad套，不過睇唔o岩，所以又返去老闆娘度買咗個幾十蚊嘅頂住先，咁佢又平俾我哋喎，第二個開心！之後我就趕返去公司啦。而於神勇的C，經已渣渣淋去買咗張Smartone iPad WiFi+3G卡用緊，果然夠勁，至於我呢就仍然想緊join SmarTone還是Peoples好。

接下來要做嘅野除咗setup都機之外，當然要想吓用乜野卡啦，另外亦要想吓買個乜野套，同埋買斷哂市嘅Camera Kit。對我黎講iPad唔止係玩具仲係工具，雖然唔係直接做書但始終響出版業工作，對於iPad出書大勢要深入理解，所以我同老細講話要去買iPad的時候非常理直氣壯也，當然事後要付出代價，就係做野做到夜晚差唔多一點先至返屋企囉，不過哩個係happy problem，相比起iPad在手，點辛苦都值得嘅。想了解尋日全城瘋狂買iPad嘅實況，可以去Twitter hashtag #ipadhk 了解吓，唔好同我講早買（水貨）早享受，或唔好益人哋做勢，最緊要嘅都係「買到」哩個結果o者，iPad，我黎啦！

延仲閱讀：
neonpunch – Our Favorite Photos on iPad Hong Kong Launch Day

Related posts:

1. 支援iPad的中文電影及音樂網站 同事C和我一樣買了3

Related posts brought to you by Yet Another Related Posts Plugin.