（以下內容為18禁題材，並有大量不雅用語甚至粗口，自問不能接受或假道學者敬請自重不要進入，或尋求家長指引）
曾經有某blogger講被人邀請試避孕套，感覺十萬個offensive。確實，沒有人叫你去公開你有幾濕滑我有幾堅硬，但喪鬧有乜謂？唔收又唔寫咪算。就正如去試食，請你大帝仲要俾你選埋Table for Six人頭，都係不停未食先叫唔好，咁樣真係無人可以please到你，因為從來無人迫你去食/用。講遠咗，其實都係想引伸到性哩樣野，每人呎度唔同，有人好鐘意去141分享，又有人鐘意關埋門睇AV，無問題，亦無話點樣為之好同唔好，不過香港男性普遍都只重量，不重質（都講咗好多年都係講哩啲），女人又淨係識得受，唔識講出自己感受（一講就驚被標籤為淫婦），有好多人大好婚姻同關係就係咁樣慢慢枯乾然後就咁一世，幾咁無謂。
實在唔明，點解讀書做野都有得持續進修，但係性愛哩家野無人真心去進修？唔好話睇AV學特技就係（雖然好過無），又或者學習取悅另一半就係罪？Come on，如果連one on one都唔俾去到ultimate skill set，難道人人都要做雞做鴨先至可以讓對方快活？甚至連好好認識自己嘅身體都係罪過？為咗補足香港普遍人對性「不夠自愛」嘅位，唯有開一個我睇過、覺得內容有用同有趣，仲仍然買得到書嘅書單出黎。我亦好肯定，拋磚都不能引玉，因為個個人一講性唔係以為淫蕩就係中毒。但anyway我手寫我心，唔鐘意睇就skip啦，無謂要你洗眼，但千祈唔好一面睇一面鬧，搞到你性功能失調就無謂。
《屌醫學：正確認識命根子的結構、生理、保健及治療！》
作者： 許耕榕
出版社：我們出版
今次介紹三本之中只係無買哩一本，是關內容有點bloody，包括增長陰莖手術點做嘅圖解，又或者精索靜脈曲張手術係點做咁。我自己都儲埋好多寵物身體結構嘅書（因為有學過），但男人結構就真係免啦，因為會放入口食嘅野唔係樣樣都咁需要深入了解，例如你食豬腸食牛雜但係唔會係咁研究佢點樣洗。不過哩本書真係男人必買：男人嘅短處，例如包皮過長、前列腺增新嘅講解、撚細係唔係真係無得救都有詳盡嘅描述同建議解決方法，仲有其他唔同嘅男性性醫學知識，實在係太過expert級數嘅書。而最爆嘅係，個作者許耕榕醫生響書入面寫佢自己幫自己做「屌」（唔係小）手術的經過：只係搵一個助理幫佢手，然後自己麻醉自己做手術，而且咁樣醫自己仲要係唔止一次，就係因為佢醫到自己嘅屌，真正明白啲病係點樣發生，所以醫人先至有一手；而且許醫師發明嘅「陰莖靜脈截除術」仲獲得美國專利，真係名符其實嘅「鳩威」。就係哩一份勇同哩一份權威，哩本書就經已值得所有男性收藏啦
《絕倫食：寫給男人的壯陽飲食講座》
作者：小泉武夫
出版社：遠足文化
明明中國係食補最大最多元化嘅國家，點解會由日本人寫哩本咁有趣嘅書，完全大惑不解。但作者真係好野，有好多唔同國家嘅壯陽食補，例如佢自己國家日本嘅羊鞭同睪丸都會夠膽試食，食完之後搞到慶合合無處發洩都寫埋出黎，真係好鬼好笑。基本上除咗日本以外，各國嘅壯陽食品，近至中國，遠至南美作者都有涉獵，並且解釋佢哋係唔係真正有用，例如「動物的陰莖到底有沒有效？」、「能製造精子的食物」，我估有好多人都想知；而中國人食粥嘅習慣竟然亦係同咸濕野有關，真係想佢唔到！當作有趣嘅「食物書」黎睇好，或者想幫吓自己進補都好，睇完起碼有個底知道再可以搵乜野資料，是關中醫書都有一啲壯陽嘅書單，只係佢哋真係好悶，悶到完全唔想知佢講乜。而哩本絕倫食就得意到當係消閒書睇都唔會悶親你。再者佢本書雖然講係「寫給男人」，但內裡都有例如「女人的春藥」嘅女性篇幅，加上作為女性如果想暗暗地為男人做番啲野，幫佢好好進補，講吓講吓發現原來哩本書男女都o岩睇呢。不過提一句，睇還睇，有病就真係要去搵醫生唔好亂試偏方呀。
《九九養腎功》
作者：淦金泉
出版社：晨星
睇個名經已係勁野啦，好多人會即時將九九養腎功聯想到條撚可以吊起成架車嘅九九神功，正所謂好腰好腎好男人，九九神功只係九九養腎功其中一門幾爆吓嘅分枝，點樣用氣功提升男人嘅活力先至係王道。我原本又係唔想買哩本書，亦無能力去執行哩本書入門嘅任何事，不過就係哩個九九神功嘅誤會，又使我八八掛掛嘅性格發揮出黎，繼而再睇完本書先至明白，要練功都要付出好多，包括要忍尿，同埋用唔同嘅方法去打攪細佬，例如用艾灸去薰佢（熱傢喎！）、用筷子去打龜頭（我估…都會痛傢吓嘩？）、同埋學習「登登登登！」好勁嘅插沙法！，少啲意志力都即時交咗功課同整親，仲點樣可以再練落去？
只係如果你忍得到練成功之後，就可以學習點樣「採陰保陽」：點樣揀適合採補嘅對象、去乜野場地進行、用乜野姿勢都有詳盡介紹。亦有提醒大家乜野情況下唔適合做愛，同埋如果「玩」到樂極生悲又點解救，真係由弱雞到壯男再講埋點樣急救保你房事順暢都一本落齊，非常之咁全面。
以上就係今次介紹嘅三本書，補充番《九九養腎功》被台灣評為18禁，要封膠袋，所以要講番內裡所有練功的圖解都係繪圖黎，唔係真係影住條撚，唔駛驚咗肉酸先。但係我都唔明《屌醫學》都有撚圖，但點解又唔係18禁呢？而《絕倫食》淨係有文字無撚圖，包咗封面響地鐵入面都可以施施然咁睇嘅，只係忍唔住會陰陰笑之嘛。最後長氣都係要講，所有關於健康嘅野，睇咗當長知識就好啦，如果自己有病，唔好亂黎，記得睇醫生，唔好死忍呀！
