毒撚者，單身人士也！點解要講吓佢哋點樣報稅？因為如果你經已有另一半或者經已揹往400萬（仔女）響身，唔駛供樓都要養化骨龍啦，要計住每一分每一亳又點會唔識報稅？至於毒撚到依傢都未報稅嘅話，一係HEA緊，一係唔鬼想理，咁，係唔得傢！唔交報稅表唔止會被罰多交稅款，會俾稅局亂鳩咁評你稅，更恐怖嘅係，就算你之後填番，佢係有權唔計你應該有得減免嘅免稅額，例如強績金呀慈善捐款呀，真係喊得一句句。老實說，講報稅問題最好梗係由專家講啦，至於我，只係用過來人嘅角度講吓哩件事，真係有問題嘅話，最好去搵會計師同專業人士搞搞佢。
我想暴睡，但要報稅
可唔可以唔報稅呀？
首先人工少或者失業唔係唔報稅嘅理由，只要你嘅人工過咗基本免稅額（2012/13 – $120,000，即係月入一萬）就要報稅。公司通常會俾張紙（Tax Return）你方便你睇番自己搵過幾多錢，但實際係，僱主幫你將條數報咗上稅局，咁你一定「在數難逃」傢啦。咁如果公司唔俾果張野你呢？其實你更加要報上去，倒番轉頭，稅局可能會查番你嘅僱主，所以如果你做緊一間仆街公司嘅話，係時候要隊冧佢傢啦！做果份工有貼士或者另有兼職亦一定要上報，都係果句，既然間公司報咗你上去，你自己唔填即係個兩邊記錄唔對啦，出起事上黎真係會大鑊傢。失業人士更加要報稅，因為交稅有預繳嘅部份，你報咗上去的話，到真正稅單出咗黎，你係可以要求暫援俾預繳稅嘅，不過遣散費係唔駛報稅嘅，哩樣要留意。
用網上報稅慢慢先至搞又得唔得？
填紙嘅報稅表確係好鬼煩，所以有好多人都會選擇網上報稅。咁確實係好嘅，是關所有僱主報上去嘅數經已預先響個系統入面張電腦報稅表出現，而且仲可以比用紙張報稅嘅人遲成個月先（今年稅局5月2日出稅表係預你6月2日要寄番去佢傢，用網上報稅就可以7月3日先至最後限期）至交稅表添。不過問題係，有好多人大安旨意到差唔多報稅時間先至申請網上報稅，我可以肯定，你奶硬野！亦有好多人以為遲啲報稅個「稅務易」戶口會無事啦，到頭來唔記得密碼試得太多或太耐無用搞到個戶口涷結住咗要寄番張表格去稅局重設。哩樣野《影．腦．者》網誌嘅網主亮仔教咗一個秘技：去香港政府一站通開個戶口，然後連結番去稅務易，咁就唔會因為太耐無用過個戶口而被涷結咗啦，我試過，真係work傢！
有乜野可以免稅傢？
供養父母免稅額 – 有分係唔係同住定唔同住，如果係同住嘅話，免稅額係多一倍傢。咁當然話明係香港嘅稅，如果父母響外國住就無咁嘅歌仔唱啦。最大鑊係同家姐亞哥細佬妹爭免稅額，稅局會係咁寄信俾你問到你爆，甚至懷疑你填嘅嘢o岩定唔o岩於是起你底，真係好大鑊傢，所以報之前一定要拆掂佢。
個人進修開支 – 準則係只要對你工作有幫助的就可以試吓睇吓有無得免稅，所以報班嘅時候記緊要keep單。
MPF或者退休計劃 – 有好多人係唔記得可以扣番MPF傢，如果你以前報稅無填到嘅話，你可以試上稅務易或填表格追番條數，五年內嘅認該都可以試吓。另外有好多人好有型就咁將僱主幫你報上去條數乘番5%就算數，但就唔記得入面可能有No Pay Leave有Bonus所以條數未必係就咁乘5%。我自己就習慣每個月將稅單入面嘅數字入落到一個Excel表到，到最後就可以睇番公司有無幫自己報錯稅同MPF條大數係幾多啦。
慈善捐款 – 只要係獲得《稅務條例》第88條獲豁免繳稅嘅慈善機構就可以免稅，張收據就唔駛寄去稅局但係都要keep住7年以免佢抽查。即係咁，唔好以為話自己係慈善機構果啲就係慈善機構先至得傢，唔想豬咗，去惠施網check真啲啦。另外如果你真係唔想交稅俾個衰政府，不如捐錢仲實際，例如支持「7 ∙ 7無國界醫生日」捐出一日人工咁，有意義幫到人，又可以對抗政府亂駛我哋嘅血汗錢，雖然就間接咗啲。
居所貸款利息 – 買得樓嘅即係精明嘅業主即係唔係毒撚啦？咁醒，自己處理啦。
北上或者去澳門工作要點報呀？
是咁的，內地同香港設有避免雙重徵稅協議，響12個月內有183日豁免，係唔駛俾中國稅嘅。但係如果你嘅人工係中國僱主出，又或者你選擇交中國稅，就要交番中國稅啲文件，好似「原稅證」、「個人入息稅稅表」同出入境紀錄咁。至於響澳門工作就正囉！澳門稅率係低過香港嘅，咁梗係交澳門稅啦。
咁我自僱又駛唔駛報稅呢？
老老實實梗係要報啦，你點知自己第陣時會發生乜野事？萬一一朝彈起但係俾人抽查你以前無報稅就出事傢啦。
咁橋寫到哩度發現聽日（5月30日）有個會計專才免費教你填報稅表嘅活動，真係有問題嘅話，行去問好過自己亂咁搞，避孕就可以，避稅，真係唔好試！
