就算唔係斷捨離過年都要執屋，而我就轉入直路，雖然之前都寫過類似嘅嘢，就等我綜合吓唔要嘅物品有乜嘢出路（以下除非註明否則都是捐獻性質）：
1. 屋企附近嘅回收商（有錢返）
我比較方便就係每日都有回收商嘅車響我屋企樓下收紙、舊衫同鐵。其實好多社區都有回收商/店，可以多加留意，或者睇吓政府網站（下面有講）。
2. 回收箱
確實我屋企樓下就有兩組回收箱，但唔係樣樣嘢到放得入去，唔識分類嘅話到頭來會好心做壞事。一號膠二號膠不同類型廢物嘅知識我響搞走塑group度學嘅，保護環境我都做唔到十足十，但有做好過無做。
3. 基督教勵行會
都講過好多次但重覆一下，佢會回收衫、鞋、小電器、新淨毛公仔、VCD等等（最重要係毛公仔，因為有好多機構都唔收毛公仔），響網站有詳細清單及網絡方法，如果滿三袋紅白藍可致電免費上門回收，少過三袋上門會收60蚊費用，但預約需要時間。也可以直接放在四家回收中心的回收籠。物品會給有需要的家庭或放在勵行站供人購買，經費亦會幫助有需要的人。
4. 救世軍
確實係會回收舊衫褲鞋等，但好多人都話未開門就放響人哋門口 ─ 咁樣係唔正確傢！係要等佢開咗門交畀職員呀。救世軍都有上門回收，但要夠五袋大紅白藍至可以。
類似3. 4. 嘅機構有國際十字路會同屯門嘅曙光計劃，但我未用過就唔評論啦。
5. 舊VHS
如錄有舊節目，可交給香港民間電視節目資料庫 VCRBase，約時間於港鐵站交收。
6. 音樂珍藏
如果你儲有某個偶像的東西但又要let go，可聯絡香港公共圖書館 – 香港音樂特藏，作出相關評估後會建議你將物品直接放在區域圖書館轉交中央圖書館的小組，又或由小組直接到府上回收。
7. 文具
可捐贈文具銀行Bank of Stationery。
8. 電腦類
舊電腦、相機、scanner、printer當然可以選擇賣咗佢，但更加可以搵明愛電腦工場回收，將電腦重生後送畀有需要人士。填表後三日左右就會致電預約上門回收時間，勁方便。
9. 其他細碎東西
可於Facebook Oh Yes It’s Free、swap-it-hk、JupYeah 執嘢網站等free咗佢，free即係送出去。你覺得係垃圾例如過期食物、舊喇叭等人哋當係寶。咁當然都會有啲白目嘅人士（比例好細），但你係free嘢果個係你，你做主係唔駛理佢嘅。
10. Carousell（有錢返）
賣嘢都係一個方法，但呢個係一個好疲倦嘅過程，要報價、要畀人壓價，又要被要求影相前後左右上上下下左左右右，跟住約交收又打死狗講價，啲精神留返黎訓陣會開心啲。而且佢個數據庫嘅量太大，你普普通通咁post嘢，畀人睇到嘅機會比較低。不過Carousell嘅好處係放件物件上去賣真係好容易，影相再寫幾隻字就得，而且服務暫時仲係免費嘅添。
注意事項
政府個減廢網站啲嘢係未必咁更新嘅，最好打電話去確認一下
如果對斷捨離、極簡主義、環保生活有興趣甚至如何透過維修家居達至源頭減廢，建議加入以下Facebook群組多作了解，我經已揀咗啲比較上可以講廣東語嘅群組出黎，唔怕雞同鴨講：
執屋 JuppUk
斷捨離/極簡主義的生活分享
搞走塑
家居、維修,查詢討論區
兜嘢掉哂啲唔要嘅野都係一個辦法黎，但係地球先生會哭哭喔。
2月25日補充 – 由於有人回應需要書嘅處理，所以我繼續寫埋落去：
11. 書送快樂
留意佢唔係樣樣書都有，宗教或者簡體字書係唔會收嘅，詳細清單可以睇佢哋嘅網站。
12. 我的書房（有錢返）
呢個二手書店品牌近日剛擴充大南街書店，兩層高大到喊！可以聯絡佢哋睇吓收書嘅安排係點。
Leave a Reply