死待2：人不可以做孤獨精

只要死待出現一定係爽片無誤，連串動作流暢潚灑你預咗，係就係暴力咗啲，但比起異型係咁爆到個身七零八落，反而殺人見血我係接受到，比起第一集有啲場面都要睇到掩眼，今次我又OK喎。

死待2故事其實好簡單，為愛情、親情、友情加組隊打 Quest，絕對無復仇者要數住邊個角色有戲邊個角色有講過笑話咁複雜，甚至其中一個角色有 Thanos 其中一粒石嘅能力（演員本身都係演 Thanos 果位）並影響全局，講衰啲你會覺得「又係果啲橋」，但實際係完全唔悶真係無問題，而且我真係覺得今次啲新 friend 子所帶出黎嘅感覺，令套戲無第一集咁冷，起碼佢上次只係為女友而戰，今次就心善好多，識得為人著想，更會多謝 friend 子，使角色更有人性而唔係一味只識打打打，令我更鍾意佢，

劇中穿插好多其他戲橋同外國人玩開嘅笑話，識嘅話會笑死，但唔識嘅話亦無損觀影嘅開心。唔經唔覺好快就過咗兩個鐘，而為咗更深入睇果啲 detail 位（例如一開波果一堆動作其實有好多細微嘢加咗入去裡面），呢套絕對需要二刷。

今次睇嘅係中環英皇戲院VIP 院嘅優先包場（利申：戲票費用自付），因為好友嘅悉心安排，唔止有各種紀念品，包括夏威夷 Shirt、Chopping Board (用佢黎切生果非常好用，今日經已試咗）、日版海報、杯緣子，最正係 Deadpool 本人出現謝票，真係開心到震！所以有朋友係幾咁重要，衷心多謝佢嘅關照呢。