原本係唔會睇呢套，但有一日睇完明豬 930（呢個係我唯一會睇嘅 CCTVB 節目）順手想睇一陣 Viu TV 晚間新聞，點知轉到去呢個節目，見到綾瀨遙成個醒神哂，畢竟佢係我幾喜歡嘅日本女星黎。果陣剛播出第六集，綾瀨遙飾演嘅宮本亞希子同繼女宮本美雪一齊行嘅時候講嘅說話令我意識到，依！？佢竟然經已唔係情情塔塔 feel，進化到做人亞媽（Sorry 我係完全絕對唔會追新番果種人），而且動不動就 90 度鞠躬甚至成個人爬響度叩頭求原諒，又幾搞笑。再睇下資料，綾瀨遙竟然打敗咗因為《不自然死因研究所》做起個勢嘅石原里美（我都好鍾意佢傢）同期果套《高嶺之花》，就此搞到我入咗坑。
主角綾瀨遙飾演宮本亞希子，原名岩木亞希子嘅佢係光友金屬部長，係一個事業型嘅女強人。為咗做成生意可以出盡百寶，例如將客戶同情婦一齊嘅相片唔覺意咁漏出黎，等到對方簽單，又或者為咗搞掂隻鑊對客戶嘅 CEO 奉上妖刀村正等。擅長分析對家嘅行為再進行 present，響商業世界上面簡直係超人，連男手下都非常敬重甚至愛慕佢。但 33 歲獨居嘅亞希子響商業以外嘅待人接物簡直就係零，因為佢將所有人際關係都當係 business plan 咁做，又或者可以講係高分低能，於是鬧出好多笑話。
由竹野內豐飾演嘅宮本良一，係亞希子公司嘅死對頭櫻金屬工業嘅小薯。自知有病嘅佢覺得亞希子夠硬淨，再加上身邊又無合適嘅女性，竟然向亞希子求婚希望將個女交托俾佢，而對方竟然答應！
第一次見面，亞希子派卡片俾美雪妹妹，話自己將會係佢嘅新媽媽，咁樣梗係令一個小妹妹反感啦。亞希子食完檸檬之後去買咗一大堆兒童書睇，又當係做 project 咁重新制訂策略，實在係太搞笑。最正係佢俾咗封信美雪，拆開黎睇竟然係 CV 黎，真係好癲。後來因為亞希子引導美雪解決咗被朋輩欺淩，於是美雪就響爸爸指導下用電腦覆返封信，正式批准亞希子成為佢嘅新媽媽。
以上就係第一集嘅劇情，我依傢追到第六集。除咗亞希子個人硬堀堀，好精明，但一做錯嘢就會成個人謝哂，覺得自己雙倍失敗個樣超搞笑之外。你好難會見到一個人只係不停白恤衫、Tee，下身襯深藍色半載裙但係可以著得咁好睇；爸爸良一明知自己有絕症但係都好開朗咁樣面對，前妻亦因病死咗但仍然係咁深情；囡囡亞希子妹妹童年版亦做得真係幾好，於是睇到第二集後半就開始好投入劇情。咁就仆街啦，因為接住下黎有好多令人幾眼淺嘅場口位，我就無好似我朋友咁樣連超搞笑嘅第一集都喊得出，但係每集有啲眼濕濕你預咗，尤其係良一死嘅第六集，我啲眼淚真係缺堤。
亞希子原本只想嘗試有家人，可以有人分享佢嘅感受，唔想孤獨自己住，於是答應良一假結婚睇住個女。兩個人連手都無拖過亦係分房訓，到後來兩人關係有突破，良一由放棄治療到積極醫好自己個病，卻不敵病魔。喪禮期間美雪聽到人哋鳩噏，話亞希子應該會放棄唔要佢，於是自己走咗去洗碗。亞希子去搵美雪，兩人深情對話，亦想起自己嘅媽媽死咗之後自己一個人，唔可以留底美雪好似自己咁做孤女，亦終於確認咗自己對良一嘅感情，於是抱住美雪大喊，呢一幕真係喊濕我幾張紙巾。亦係咁，跟住落去果啲集數我唔想咁快睇哂，因為咁好睇嘅劇，睇完就無，亦唔怪得之收視同《逃恥》有得揮。
