我話過,我唔睇電視係堅真係唔睇電視傢,不過唔睇之中其實都有睇,因為我指嘅唔睇係唔睇膠劇同洗腦節目嘅意思。我依傢固定咗星期三同四睇 Viu TV 96《Blindspot》、《Closer》同埋明珠 930,換而言之,開電視只會係星期三四六日9點半開始,真係睇多少少節目我都唔會。但凡事總有例外。響屋企人黎食飯嘅時候,佢哋會響我平時唔睇節目嘅時間開一啲我平時唔會睇嘅台,而就係咁,我睇咗香港開電視,即係奇妙電視嘅《百元商品》。

完全唔明,點解一啲咁 C9,咁 OL 向嘅節目,竟然除咗 Discuss 之外,無人會講?啲港女明明成日上鳩假期睇去日本旅行邊度有 100 Yen 店,又或者研究果啲 100 Yen 店必買 10 件產品傢?但呢個節目係完全無人講嘅?咁足以證明,香港開電視確係唔得掂。無他嘅,連佢哋個 Facebook Page 上面呢個節目嘅宣傳片都只係得 9 Like,又點樣期望會有好多人睇呀?不過話時話,寫啲內容寫得咁渣都得,明明個節目係 sell 啲嘢好用你就寫土地供應不足,我都寫得好過佢啦,呢個小編真係炒得。

返番去個節目,要睇都有辦法嘅,就係呢五天之內嘅事,可能 B 站感應到我想寫呢個節目,竟然有人將啲片瘋狂 upload 上去。俾我睇返我無睇過嘅好多集(上次都係睇咗某一集嘅小小,依傢 Google Search「百元商品」就搵到傢啦)。節目主要都係日本人帶住啲 100 Yen 店買得到嘅產品去外國,等啲老外估吓究竟啲嘢實際有乜嘢同途。跟住就用個案示範,等呢啲唔同國家嘅人士利用 100 Yen 店能夠買到嘅產品去解決佢哋生活中面對嘅問題。

例如有個女仔出咗省城學皮藝,立心如果學唔好就唔會返鄉下,但係佢阿媽要黎探佢,而佢又想整啲嘢送俾阿媽。可惜啲皮真係好貴,咁點算好?最後個女仔利用 100 Yen 店賣嘅假皮同飾品,做咗個好靚嘅皮套俾媽咪。呢樣嘢確係現實世界會發生嘅事,我識有做手工藝嘅朋友每次去日本都會掃貨,是關 100 Yen 店嘅手作原材料產品實在太精良,絕對出得廳堂。

咁節目入面介紹得嘅,未必件件都合用/有用,只係鍾意家事又或者買開 100 Yen 店物品嘅朋友,真係會睇得幾愉快。至於我自己,就戒買咗好耐啦,以前買埋好多依傢爆左 quota,不過好彩,買得都係有用嘅。我有時都會買定啲禮封黎用,因為去普通書局買一個好 plain 嘅都要十幾蚊,咁不如去 12 蚊店買果啲靚靚飛哂花日式禮封咪仲好。而節目裡面有啲做法可能唔係個個人認同(例如打掃嘅方法,真係各門各派都有),之但係有一樣嘢必須要同意嘅,就係每個外國人使用呢啲產品嘅目的,都係為咗令家人唔駛咁辛苦,又或者去幫人解決一啲問題,所以百元商品存在嘅目的係乜嘢吖?

「係愛呀!」

Tagged in: