以下有非常不愉快內容，未滿18歲及膽小人士請勿閱讀
有朋友仔以為我好大膽，某程度上我係但又唔係。如果你話明俾我知係「史上怪異或令人起雞皮疙瘩的神秘專輯」，啲圖又陰陰沉沉，我真係會覺得驚而唔敢去睇。但係另一方面，我又好八卦，所以都會睇恐懼鳥寫嘅嘢。雖然有人話佢係吹水皇，但佢吹水得黎又係神秘恐怖都市傳說華語資訊第一人；我有賊心無賊膽，有時都會睇吓佢寫嘅嘢，是關佢有啲故仔實在都唔係去到極級，響有心理準備下我都接受到，於是只係會打開半隻眼將啲字 copy and paste 唔睇啲圖淨係睇字呀咁。但老老實實，我真唔會 Like 同 Follow 佢個 Facebook Page，我唔想兜嘢響個 wall 度彈張圖出黎嚇到漏水。故此就算可以去 4chan、 8ch 同 reddit 度睇，但班友癲嘅乜圖都係咁貼出黎唔理你死活，我咁細膽梗係唔會搵命搏。
興趣太多，時間太小，仲要八卦，真係唔係幾好：今日我手多多發現原來恐懼鳥同 Gloria 一齊開咗個 page 叫做犯罪鳥歌，又膽粗粗睇咗佢其中一個叫做真實「恐懼鬥室」連環殺手的虐殺錄音(1)、The Toy Box Killer — David Parker Ray 第二篇嘅故事，睇黎佢唔打算寫第三篇，於是只好自己搵料睇大結局。呢單嘢係講住響新墨西哥洲嘅 David Parker Ray，職業係國家公園工作人員，亦懂得機械工程，例如公園入面嘅捉蛇器都係佢自己整嘅。呢個人響屋企隔籬用咗成 $100,000 美金搞咗個名為 SATAN’S DEN 嘅 Toy Box 貨櫃，入面放咗好多性用具，例如粗到嚇死你嘅 fake9、手銬、皮鞭、同埋一啲枝架去固定人體，仲有婦科醫生嘅床同器具，亦有攝影機同電擊裝置，更有一個箱可以將成個人放入去裡面禁錮。整個貨櫃有重重保護，就算叫到拆天都無人會聽到。David 搞個咁寧靜嘅地方你估佢會做靜心咩，咁嘅陣型唔駛講你都知，佢係會周街捉啲女仔返去慢慢享用。
最恐怖係佢會響捉咗個女仔返去後先播一段長到無輪嘅錄音帶俾佢聽（犯罪鳥歌只係翻譯咗好少嘅部份，原 script 在此）， 劈頭一句「Hello Bitch，你會發現自己裸體，然後會被咁咁咁，點點點，你最好聽聽話話做性奴，見到我就叫我做主人，見到我女友就叫佢做女主人…」當正 SOP 咁做，裡面會講出個女仔接下來會受到嘅不人道待遇，並恐嚇佢哋，如果嘗試反抗，身體會受傷甚至死亡。落葯等受害人迷迷糊糊，唔俾飽飯佢哋食經已係小兒科，更會用絲線穿過佢哋嘅妹妹同奶頭，方便用器材等佢哋更加腿張開，更變態嘅係 David 話所有用具都有消毒，唔駛驚唔乾淨云云；亦會 set 部攝錄機，等受害人直接睇返佢身體被進入同操作嘅情況。
David 講佢經已唔係第一次殺人，但係佢非常唔想殺人，通常女仔兩三個月被玩厭後就會被餵葯物然後著返好衫褲放響路邊，因為啲葯力太強，女仔都會唔記得哂發生過嘅事，而身上嘅傷口亦會好返（我懷疑劇集《Blindspot》女主角 Jane Doe 俾人用葯清洗記憶再全裸掉出去時代廣場條橋係抄自呢單嘢）。David 由佢青年時期開始經已做呢種喪盡天良嘅事，直到 59 歲先至俾揭發，一來係因為佢哋做得衰嘢多習慣咗太自信， 受害人 Cynthia Vigil Jaramillo 竟然攞到鑰匙將被鎖住嘅手腳解開，然後插爆 David 女友 Cindy Hendy 條頸走佬去到附近搵到一家人幫手報警先至逃出生天。二來佢哋太過不擇食，David 個女 Jesse Ray 竟然連自己個 friend Kelli Garrett 都帶俾自己個老豆淫辱（女友都話可以了解，個女明知個老豆係變態仲幫佢搵性奴，係乜嘢親子關係？！），響 Cynthia Vigil Jaramillo 事件當中警方發現一餅錄影帶，入面有個裸女嘅紋身被公開後，Kelli Garrett 先至開始記得返佢係其中一個女主角。三來佢有個豬隊友，響調查過程當中佢同事 Dennis Roy Yancy 供出自己同 David 一齊殺死咗自己個 ex Marie Parker。後來另一名女子 Angelica Montano 同其他受害人都報案，最後 David 因為 Cynthia、Kelli 同 Angelica 三單嘢，於 2001 年夾夾埋埋判咗 224 年，但 2002 年響一次運送轉場以便差人攞證供嘅場合，佢竟然心臟病發死咗，無仇報！
成個故事最慘當然係啲女仔，雖然保守估計 David 起碼殺咗 40 至 60 個人，但佢住果度有個大湖，而且佢又有國家公園好多禁區嘅鎖匙，就算 Dennis Roy Yancy 好詳盡咁講咗 Marie Parker 嘅埋屍處，但係 David 移動過 Marie 條屍，連同其他屍體都係搵唔到，所以 David 條罪從來都唔係殺人，而係綁架同性虐待。但我認為最恐怖嘅係， Cindy Hendy 響 2020 年將會假釋、Dennis Roy Yancy 響 2021 年出獄、Jesse Ray 應該經已出咗獄都唔係重點，而係 David 有同佢嘅朋友，甚至隻狗分享「貢品」，咁點解呢啲人同狗都無被繩之於法？原來 Kelli 同 Angelica 響事情發生後係有報警，不過警方不了了之，因為分享者入面係有警員…而查案嘅 FBI Agent Patty Rust 獨自留響果個「恐怖之貨櫃」中畫咗四日畫同搜尋證據，交完功課同上司研究完佢嘅發現之後因為太恐怖太可怕頂唔順吞槍自殺身亡，留下丈夫同啲細路真係慘中之慘。
睇呢啲故事，犯案過程係真係令人好不快，睇到好心寒，但我覺得最重要係研究呢啲窮凶極惡嘅人係點樣失手，先至可以有所防避。就好似睇 Netflix 嘅《MindHunter》，唔係話你睇咗就變態或者會成為變態，而係要了解呢啲犯 罪者有乜嘢心態。類似嘅影集我亦會建議睇《Surviving Evil》，入面重演好多真實個案，學識對付變態佬嘅手法同埋佢哋嘅心理係非常之有用，睇一季頂多兩季夠哂皮。
至於我點解會寫返哂出黎？我唔係變態，而係因為我睇完之後好驚，所以要學《貞子》咁，傳染俾你哋呀~~
