原本想寫書面語，但個個唔係話邱陽創巴係大師大師就係仆街仆都係寫書面語，我只好用廣東話寫呢一篇文平衡一下（保育粵語，盡做啦）。呢個人咁少眾，我估唔係佛教徒甚至藏傳佛教徒，仲要係噶舉、寧瑪巴派，又或者好似我咁因為馬雅十三月亮曆祖師爺 José Argüelles 係佢徒弟嘅話都唔會搵呢本書黎睇，但睇完之後又好似有啲得著喎。咁當然大家要知道呢本《作為上師的妻子：我和邱陽創巴的人生》係佢老婆黛安娜．J．木克坡嘅回憶錄，唔多唔少有啲嘢係美化咗。不過邱陽創巴強調佢乜都可以俾人知，一生係經得起檢視先至係真正嘅教化，而書中有好多嘢確實係可以隱瞞唔俾人知都攤哂出黎，感覺又真係幾堅吓。
作為一個土生土長嘅藏人，邱陽創巴（或者有寫作丘揚創巴，佢老婆叫佢做仁波切）嘅一生其實都幾黐線。出生於1940年嘅佢十八個月大就有一班西藏蘇芒甘露寺嘅喇嘛去佢老母住嘅游牧民族營地搵BB，原來第十世創巴轉世響果樹。果陣邱陽創巴只得18個月大，班友攞住佢老豆老母個名周圍問，我先至知道原來轉世可以咁威，連名都可以預知埋。跟住班友搵到佢阿媽但係老豆個名唔同，一問之吓原來依傢呢個老公唔係佢老母第一任老公，而第一任老公個名係啱傢！俾啲法物佢又好似抓周咁抓中哂前世自己用過嘅嘢，於是呢條𡃁仔就俾十八條金粉餅（大誤）「的」咗返去修法，細細個就受人尊重。但係為咗調教佢成為一位出得場面嘅大師，真係行住坐卧都俾人昅到實哂，無哂自由，不過當佢有一日明白自己天生嘅使命，就發奮圖強爆seed咁學嘢，竟然仲勁過教佢果個師傅咁滯，最後考獲堪布學位，等同藏傳佛教嘅大學學歷。當佢響西藏嘅時候夢見過飛機汽車同西方嘅事物，雖然唔知係一回乜嘢事，但佢既老師同佢講：你唔好黐線啦，發咩癲呀！就不了了之。
後來大家都應該知道佢住果度有乜嘢歷史，59年廿歲仔帶住一大隊人馬成兩百幾人徒步行去印度，中間被人阻擊過幾次都死唔去。到咗印度有達賴喇嘛幫佢舖路，做咗「青年喇嘛寄宿學校」嘅老師，真係明日之星一樣。都咁大個仔，唔駛走難就自然心野，響印度佢學識咗飲酒，不過真係犯戒嘅，而飲酒係導政佢咁後生47歲就死嘅最大原因。呢樣都唔係好勁，最勁係溝女，連西藏女尼昆秋巴炯都俾佢溝埋，仲犯戒生咗一個叫做宇色嘅仔，呢個血統純正嘅仔就係響佢死咗之後幫佢一統江山嘅繼承人。昆秋巴炯其實唔係佢第一條啪啪啪嘅女，以前響西藏佢都經已啪咗一個藏人嘅公主，仲搞大埋人哋個肚，可能佢唔知自己仲有幾多個仔女添。
得到牛津大學獎學金（所以佢嘅英文係有一口流利又標準嘅牛津口音，仲可以將藏文法本轉為英文），63年去咗英國讀書，終於見到佢發夢見到嘅嘢。果陣時邱陽創巴仲係僧人，表面上依然守戒，但個心唔係，同佢一齊響印度過黎嘅喇嘛阿貢見佢又飲酒又攬女，雖然邱陽創巴都有響自己間禪修中心開壇作法教人修持，但阿貢暗地裡好不滿。果陣時有個叫做 Diana 嘅妹豬，屋企係中上家庭，讀寄宿學校仲要同安妮公主同一間，有淑女唔做，竟然迷上咗呢個佢尊稱做仁波切黎自東方嘅僧人。因為 Diana 知道自己前世係西藏僧人，覺得同仁波切有好緊密嘅關係，見到佢就心花怒放。於是星期六會響宿舍偷走去見仁波切同參加法會之類。有次 Diana 供養咗個蕃石榴俾仁波切，呢個仲唔係pop the cherry嘅訊號？
咁橋嘅係邱陽創巴果期亦覺得自己僧人咁樣成日著僧袍神神秘秘，對於西方人黎講會覺得佢高高在上，好難接受佛法嘅教導，所以決定還俗。亦因為交通意外，半邊身癱瘓，響床上面休息嘅時候，呢條妹豬又去探佢。真係半邊身癱但果度唔癱，16歲仆仆趣有食唔食罪大惡極。又真係咁啱得咁橋英國改例俾16歲嘅人可以自己簽紙結婚，呢個妹豬就係咁樣響69年嫁咗俾個半邊身癱咗嘅前僧人，當日仲因為新法例生效比小報響婚姻註冊署出面追住採訪。Diana 阿媽見到自己個女嫁咗個咁嘅人激到生蝦咁跳，直頭斷絕關係，嫁個咁嘅鬼嘢，仲有乜前途？阿貢亦因為咁樣同邱陽創巴反面，開壇得到嘅供養一啲都唔過佢手，叫佢食自己。
之後兩夫婦去美國過咗一段苦日子，真係多個錢都無，例如生完仔血流不止無錢用，老公又出咗去弘法，Diana 慘到去西聯等匯款，滴住血去醫院刮宮。不過邱陽創巴真係有料到，好快就聚集咗一班弟子，全盛時期美國、加拿大、英國、歐洲各國都有佢名為「金剛界」嘅組織，大型活動每次都千人起跳。而佢將自己既生活同道場搞到好似皇室咁，又有攝政王又有董事局又有近衛隊，目的係響佢死後都有一個制度等到佢重要嘅香巴拉教化可以傳承落去。想像吓邱陽創巴響美國果陣時係70–80年代，要一班嬉皮士鬼佬信奉有加唔係一件簡單嘅事。
咁本書係妹豬 Diana 寫嘅咁梗係寫吓呢個妹豬都唔弱，為左精進自己，去過西班牙同德國學習盛裝舞步騎馬仔，最後仲有自己嘅學校，佢絕對唔係一個跟住仁波切就無咗自己嘅女人，生咗四個仔，而佢啲仔又有大寶法王又有頂果欽哲法王話佢哋係活佛轉世真係好威豬，有兩個仲唔係仁波切嘅種黎。點解會係咁？因為放咗佢去外國騎馬仔讀書嘅期間，仁波切下體都唔空閒，響佢一生承認嘅有七個明妃，即係妃子啦，無承認過嘅真係唔知幾多。個說法係做愛就係交心嘅時刻，係用一個無距離嘅方式去教化弟子（咁男弟子呢？喂！），而妹豬亦係知道同明白嘅，仁波切有幾多條女從來都無隱瞞過，但咁樣係唔會動搖到妹豬嘅地位，因為佢哋嘅愛係遠超越魚水之歡。而妹豬都唔係一件省油的燈，佢同仁波切嘅醫生米喬搞上咗，雖然都有同仁波切中出，但係第三同第四個仔一睇頭髮顏色同個樣都知係米喬嘅。但係大愛呢樣嘢我哋凡人真係唔會明傢，佢啲仔全部都跟返邱陽創巴姓木克坡囉。
我寫到咁大家唔好以為邱陽創巴只係得搞跟做，最juicy嘅嘢梗係寫咗俾你睇先。事實上佢教導果一part係無hea傢，要修法吖？唔做足前行大禮拜嘅功課係唔會傳俾你。見到你根器唔足吖？唔會傳俾你。見到你扮哂嘢覺得自己高高在上好傲慢？響你讀經時係咁整蠱你。嚴肅嘅時候好有威儀，但同你玩遊戲嘅時候（佢有遊戲中學習嘅法門）又好開心喎，而且真係千幾個人之中都記得你個名，講一兩句就指點到你有乜嘢問題，又會同你食煙飲酒high嘢（係個上師陪你high傢咋，因為佢隊完葯係完全正常人咁嘅樣）。所以覺得佢唔OK嘅一早就走咗去，覺得佢好嘅真係會死心塌地。話說佢呢款嘢密宗叫做狂慧或者瘋智 ( crazy wisdom )，可以想像呢個痴線佬唔係人人都buy。不過作為一個過氣又懶嘅藏傳佛教徒，我可以講如果有個咁嘅師傳以身作則話俾你知藏密係唔扮嘢做自己，我會超鍾意修法，但係雙修就免啦。
如果你對藏密有些少認識，又好似我咁八八卦卦，呢本書你會睇得超開心。同埋放心，無咸嘢，唔係 《刺殺騎士團長》果款，不過佛哲書舍都係無得賣。另外想講呢篇嘢大家唔好睇啦，佢跟本亂引亂作，有好多段落本書都無嘅。
