除咗有一個雖然經已好返但要覆診嘅病之外,響手術五個月之後,竟然無啦啦患上咗五十肩。我自己覺得呢樣肯定係壓力所致,因為成日話五十肩係會主力手即係我嘅右手痛,但我竟然係左手痛,仲唔係有鬼?

點解無啦啦會覺得手痛,其實真係講唔出。我只記得忙完一輪,有一日突然連扣 Bra 帶都痛。嘩咩料?再試試用手背睇吓摸唔摸到後肩胛骨,發現真係唔得喎,就即時去睇睇開果個骨傷料中醫。

經過佢解釋一輪,話一係五十肩,一係就係唔知邊個位有事,可能要做手術。天呀!咩事呀!不過醫師話可以針灸試吓有無改善,有就係五十肩。而五十肩其實又叫肩周炎,唔係五十歲先至會有,任何年齡人士只要有運動創傷或者長時期維持同一個姿勢去做某啲嘢又用錯力都可能會傷咗隻手而自己唔知(咁各位巴打打丁果陣時係咪唔好咁大力?)。我就針咗大約十幾次度,我都叫做好忍得痛,但再拔罐加拍打果吓嘢,真係世界級!我仲唔夠傷咩,點解要咁對我?

針灸過後確係好咗,而我一直相信有病係因為個心有問題,於是就自己治療自己。覺得膊頭痛,即係有壓力未解決啦,咁咪減輕自己嘅壓力啦,做人 Hea 啲囉。再加上跟呢幾個 video 去操練(我差唔多睇過哂所有 YouTube 嘅 video,呢四個堅係有用),除咗隻手舉得太高有少少冤之外,摸得返後肩胛骨,帶 Bra 亦無問題,五十肩竟然好返哂!

所以綜合黎講,要五十肩好返,首先你要睇醫生確認你個症係乜嘢,呢樣係唔慳得。如果真係五十肩,就千祈唔可以怕痛,一定係要跟 video 去做運動,因為你越怕痛,肩膊就會越受限,就越會更加痛。但如果唔係五十肩,就會越做越傷。

其次就係戒口,一切中醫上面會發嘅嘢唔好食咁多,尤其係糯米,係大忌,千祈唔好食。

到最後我想講確實有啲人唔搞佢五十肩都會好返,但係唔活動吓佢,肌肉萎縮咗,以後都做唔到某啲角度,到時仲大鑊。而平日對得個 mon 太耐都要記得轉動吓隻手,做吓少少手部運動,咁就幾多歲都唔駛怕五十肩啦~